ഡോ.ഷംഷീർ

ആഗോള വിപണിയിൽ തിളങ്ങി മലയാളി സംരംഭം; ആദ്യ ബോണ്ട് വഴി 4,708 കോടി സമാഹരിച്ച് ഡോ. ഷംഷീർ വയലിലിന്റെ ബുർജീൽ ഹോൾഡിങ്സ്
 
– ഒഴുകിയെത്തിയത് 15,066 കോടി രൂപയുടെ (1.6 ബില്യൺ ഡോളർ) നിക്ഷേപ താല്പര്യം; ആവശ്യപ്പെട്ടതിന്റെ മൂന്നിരട്ടിയിലധികം
– ബോണ്ടുകൾ ജൂലൈ ഒന്നിന് ലണ്ടൻ സ്റ്റോക്ക് എക്സ്ചേഞ്ചിൽ വ്യാപാരത്തിനായി ലിസ്റ്റ് ചെയ്യും.
– പ്രാദേശിക പ്രതിസന്ധികൾക്കിടയിലും യുഎഇയുടെ വിപണി കരുത്ത് തെളിയിച്ച് ഡോ. ഷംഷീർ വയലിലിന്റെ തന്ത്രപ്രധാന നീക്കം
 
അബുദാബി: മലയാളി ആരോഗ്യ സംരംഭകൻ ഡോ. ഷംഷീർ വയലിൽ ചെയർമാനും സിഇഒയുമായ യുഎഇയിലെ പ്രമുഖ ആരോഗ്യസേവന ദാതാവായ  ബുർജീൽ ഹോൾഡിങ്സിന് ആഗോള സാമ്പത്തിക വിപണിയിൽ വൻ നേട്ടം. കമ്പനി ആദ്യമായി പുറത്തിറക്കിയ ‘സുക്കൂക്’ (ഇസ്ലാമിക് ബോണ്ട്) വഴി 4,708 കോടി രൂപ (500 മില്യൺ യുഎസ് ഡോളർ) വിജയകരമായി സമാഹരിച്ചു. അബുദാബി സെക്യൂരിറ്റീസ് എക്സ്ചേഞ്ചിൽ ലിസ്റ്റ് ചെയ്തിട്ടുള്ള ബുർജീൽ ഹോൾഡിങ്സിന്റെ ആകെ 14,124 കോടി രൂപയുടെ (1.5 ബില്യൺ യുഎസ് ഡോളർ) ബോണ്ട് പദ്ധതിയുടെ ഭാഗമായാണ് 5 വർഷത്തെ കാലാവധിയുള്ള സുക്കൂക് പുറത്തിറക്കിയത്. ബോണ്ടുകൾ ജൂലൈ ഒന്നിന് ലണ്ടൻ സ്റ്റോക്ക് എക്സ്ചേഞ്ചിൽ വ്യാപാരത്തിനായി ലിസ്റ്റ് ചെയ്യും.
 
മിഡിൽ ഈസ്റ്റ് നോർത്ത് ആഫ്രിക്ക (മെന) മേഖലയിലെ ഒരു ഹെൽത്ത്കെയർ കമ്പനി 2018-ന് ശേഷം പുറത്തിറക്കുന്ന ആദ്യ സുക്കൂക് ബോണ്ടാണിത്. മേഖലയിൽ അടുത്തിടെയുണ്ടായ പ്രാദേശിക പ്രതിസന്ധികൾക്കും വികാസങ്ങൾക്കും ശേഷം യുഎഇയിൽ നിന്ന് പുറത്തിറങ്ങുന്ന ആദ്യ കോർപ്പറേറ്റ് ബോണ്ട് എന്ന പ്രത്യേകതയും ഇതിനുണ്ട്.
 
ആഗോള നിക്ഷേപകരുടെ വൻ പങ്കാളിത്തവും കുറഞ്ഞ നിരക്കും
 
ആഗോള, പ്രാദേശിക നിക്ഷേപകരിൽ നിന്ന് വൻ സ്വീകാര്യതയാണ് ബോണ്ടിന് ലഭിച്ചത്. കമ്പനി ലക്ഷ്യമിട്ട തുകയുടെ 3.2 ഇരട്ടിയിലധികം, അതായത് 15,066 കോടി രൂപയുടെ (1.6 ബില്യൺ യുഎസ് ഡോളർ) നിക്ഷേപ താല്പര്യമാണ് ലഭിച്ചത്. ബോണ്ട് വാങ്ങിയവരിൽ വലിയൊരു പങ്ക് അന്താരാഷ്ട്ര നിക്ഷേപകരാണ്. ആകെ അലോട്ട്മെന്റിന്റെ 61 ശതമാനവും അന്താരാഷ്ട്ര തലത്തിൽ നിന്ന്. ഇതിൽ യുകെ (34%), യുഎസ് ഓഫ്ഷോർ (24%), മറ്റ് ആഗോള വിപണികൾ (3%) എന്നിവ ഉൾപ്പെടുന്നു. ജിസിസി മേഖലയിൽ നിന്ന് 39% നിക്ഷേപകരും പങ്കാളികളായി. ഇത് യുഎഇ മൂലധന വിപണിയിലുള്ള ആഗോള വിശ്വാസ്യതയ്ക്ക് അടിവരയിടുന്നു.
 
നിക്ഷേപകരുടെ ശക്തമായ താല്പര്യം മുൻനിർത്തി ബോണ്ടിന്റെ ലാഭവിഹിത നിരക്ക് 7 ശതമാനമായും യീൽഡ് 7.125 ശതമാനമായും നിജപ്പെടുത്താൻ ബുർജീലിനായി. ജിസിസി മേഖലയിലെ സ്വകാര്യ നോൺ-ഐജി കോർപ്പറേറ്റ് ഇഷ്യൂവറിന് 2020-ന് ശേഷം ലഭിക്കുന്ന ഏറ്റവും കുറഞ്ഞ യീൽഡ് നിരക്കാണിത്. അന്താരാഷ്ട്ര റേറ്റിങ് ഏജൻസികളായ എസ് ആൻഡ് പി (S&P) കമ്പനിക്ക് ‘BB+’ റേറ്റിങ്ങും മൂഡീസ് (Moody’s) ‘Ba2’ റേറ്റിങ്ങുമാണ് നൽകിയിട്ടുള്ളത്.
 
തുടർവികസനത്തിനും സാങ്കേതിക മുന്നേറ്റത്തിനും കൂടുതൽ കരുത്ത്
 
ലഭിച്ച തുക നിലവിലുള്ള ബാധ്യതകൾ തീർക്കാനും ഗ്രൂപ്പിന്റെ തന്ത്രപ്രധാനമായ വികസന പ്രവർത്തനങ്ങൾക്കുമായി ഉപയോഗിക്കുമെന്ന് കമ്പനി വ്യക്തമാക്കി. ഒപ്പം, അത്യാധുനിക ചികിത്സാരീതികൾ, മെഡിക്കൽ ഗവേഷണം, നിർമ്മിത ബുദ്ധി, സാങ്കേതികവിദ്യകളുടെ വികസനം എന്നിവയ്ക്കായി ഈ മൂലധനം വിനിയോഗിക്കും.
 
കമ്പനിയുടെ ബിസിനസ് തന്ത്രങ്ങൾക്കും സാമ്പത്തിക ഭദ്രതയ്ക്കും ആഗോള നിക്ഷേപകർ നൽകിയ വലിയ അംഗീകാരമാണിതെന്ന് ബുർജീൽ ഹോൾഡിങ്സ് ചെയർമാൻ ഡോ. ഷംഷീർ വയലിൽ വ്യക്തമാക്കി. ആഗോള തലത്തിൽ നിന്ന് വലിയ തോതിൽ മൂലധനം സമാഹരിക്കാൻ കഴിഞ്ഞത് ബുർജീലിന്റെ വിശ്വസ്തതയ്ക്ക് അടിവരയിടുന്നു. ആരോഗ്യസംരക്ഷണം അടുത്ത തലത്തിലേക്ക് വികസിപ്പിക്കാൻ ഈ നേട്ടം കമ്പനിക്ക് വലിയ സാമ്പത്തിക സ്വാതന്ത്ര്യം നൽകുമെന്നും ഡോ. ഷംഷീർ പറഞ്ഞു.
 
സിറ്റി ബാങ്ക്, എമിറേറ്റ്സ് എൻബിഡി കാപ്പിറ്റൽ, ഫസ്റ്റ് അബുദാബി ബാങ്ക് എന്നിവയായിരുന്നു ബോണ്ട് ഇഷ്യൂവിന്റെ ആഗോള കോർഡിനേറ്റർമാർ. അബുദാബി കൊമേഴ്സ്യൽ ബാങ്ക്, അബുദാബി ഇസ്ലാമിക് ബാങ്ക്, ദുബായ് ഇസ്ലാമിക് ബാങ്ക്, റാക് ബാങ്ക്, ഷാർജ ഇസ്ലാമിക് ബാങ്ക് എന്നിവർ ലീഡ് മാനേജർമാരായും പ്രവർത്തിച്ചു. യുഎഇ, ഒമാൻ, സൗദി അറേബ്യ എന്നീ രാജ്യങ്ങളിലായി 20 ആശുപത്രികളും 41 മെഡിക്കൽ സെന്ററുകളും ഉൾപ്പെടെ 89 സ്ഥാപനങ്ങളാണ് ഡോ. ഷംഷീർ വയലിലിന്റെ നേതൃത്വത്തിലുള്ള ബുർജീൽ ഹോൾഡിങ്സിന് കീഴിൽ നിലവിൽ പ്രവർത്തിക്കുന്നത്.