സൈക്കിൾ

എയർപോർട്ടിൽ നിന്ന് ട്രാക്കിലേക്ക് – ദുബൈ സൈക്ലിംഗ് പാസ്’ പദ്ധതി ഉദ്ഘാടനം ചെയ്തു
–——————————-
ദുബൈ:ആരോഗ്യകരമായ ജീവിതശൈലി പ്രോത്സാഹിപ്പിക്കുകയും കായിക വിനോദങ്ങളെ ദുബൈയുടെ ടൂറിസം അനുഭവങ്ങളുമായി ബന്ധിപ്പിക്കുകയും ചെയ്യുന്ന ലക്ഷ്യത്തോടെ ‘ദുബൈ സൈക്ലിംഗ് പാസ്’ എന്ന നൂതന പദ്ധതിക്ക് ദുബൈയിൽ തുടക്കമായി. ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്‌സ് അഫയേഴ്‌സ് – ദുബൈ ആണ് “From the Airport to the Track” എന്ന പേരിൽ പദ്ധതി ആരംഭിച്ചത്. ദുബൈ ഡിപ്പാർട്ട്മെന്റ് ഓഫ് ഇക്കോണമി ആൻഡ് ടൂറിസം, ദുബൈ സ്പോർട്സ് കൗൺസിൽ എന്നിവയുടെ സഹകരണത്തോടെയാണ് പദ്ധതി നടപ്പാക്കുന്നത്.
പദ്ധതിയുടെ ആദ്യഘട്ട ഉദ്ഘാടനം 2026 ജനുവരി 10ന് നാദ് അൽ ഷിബ സൈക്ലിംഗ് ട്രാക്കിൽ നടന്നു. ജിഡിആർഎഫ്എ ദുബൈ ഡയറക്ടർ ജനറൽ ലഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി, ദുബൈ ഗവൺമെന്റ് ഹ്യൂമൻ റിസോഴ്‌സസ് ഡയറക്ടർ ജനറൽ അബ്ദുല്ല അലി ബിൻ സായിദ് അൽ ഫലാസി, യുഎഇ സൈക്ലിംഗ് ഫെഡറേഷൻ ചെയർമാൻ എൻജിനീയർ മൻസൂർ ബുഐസൈബ എന്നിവരുടെ സാന്നിധ്യത്തിലായിരുന്നു ചടങ്ങ്. ജിഡിആർഎഫ്എ ഡെപ്യൂട്ടി ഡയറക്ടർ ജനറൽ മേജർ ജനറൽ ഒബൈദ് മുഹൈർ ബിൻ സുറൂർ, വിവിധ സർക്കാർ സ്ഥാപനങ്ങളുടെ പ്രതിനിധികൾ, കായിക–സാമൂഹിക രംഗത്തെ പ്രമുഖർ എന്നിവരും പങ്കെടുത്തു.
ഉദ്ഘാടന ദിനത്തിൽ നൂറുകണക്കിന് പൗരന്മാരും പ്രവാസികളും വിനോദസഞ്ചാരികളും സൈക്ലിംഗ് പ്രേമികളും പങ്കെടുത്തത് പദ്ധതിയുടെ സാമൂഹിക പ്രാധാന്യം വ്യക്തമാക്കി.
ദുബൈ നഗരത്തിലെ ദൈനംദിന ജീവിതവുമായി കായിക വിനോദങ്ങളെ ബന്ധിപ്പിക്കുക എന്നതാണ് ‘ദുബൈ സൈക്ലിംഗ് പാസ്’ പദ്ധതിയുടെ മുഖ്യലക്ഷ്യം. ദുബൈയുടെ വിവിധ ഭാഗങ്ങളിലായി തെരഞ്ഞെടുത്ത ഒമ്പത് അംഗീകൃത സൈക്ലിംഗ് ട്രാക്കുകളിലൂടെ താമസക്കാർക്കും സന്ദർശകർക്കും സമഗ്രമായ കായിക–ടൂറിസം അനുഭവം നൽകുകയാണ് പദ്ധതി. തുടക്കക്കാർ മുതൽ പ്രൊഫഷണൽ സൈക്ലിസ്റ്റുകൾ വരെയുള്ള എല്ലാവർക്കും അനുയോജ്യമായ രീതിയിലാണ് ട്രാക്കുകൾ ഒരുക്കിയിരിക്കുന്നത്.നാദ് അൽ ഷിബ–മെയ്ദാൻ, മുഷ്രിഫ് പാർക്ക്, ജുമൈറ കോർണിഷ്, അൽ ഖുദ്ര / സൈഹ് അൽ സലാം, ദുബൈ മറീന, അൽ ഖവാനീജ്, ദുബൈ വാട്ടർ കനാൽ, മുഷ്രിഫ് മൗണ്ടൻ ബൈക്ക് ട്രാക്ക്, ഹട്ട മൗണ്ടൻ ബൈക്ക് ട്രാക്ക് എന്നിവയാണ് പദ്ധതിയിൽ ഉൾപ്പെടുത്തിയിട്ടുള്ള പ്രധാന സൈക്ലിംഗ് പാതകൾ. നഗരമധ്യത്തിൽ നിന്ന് പ്രകൃതിസൗന്ദര്യമാർന്ന മലനിരകളിലേക്കുള്ള ഈ യാത്ര ദുബൈയുടെ ഭൗമവൈവിധ്യം തെളിയിക്കുന്നതാണെന്ന് അധികൃതർ പറഞ്ഞു.
ജനങ്ങളുടെ ദൈനംദിന ജീവിതത്തോട് ചേർന്ന് നിൽക്കുന്ന സംരംഭങ്ങളാണ് ജിഡിആർഎഫ്എ ദുബൈ ലക്ഷ്യമിടുന്നത്. വിസയും റെസിഡൻസി സേവനങ്ങളും മാത്രമല്ല, ദുബൈയിൽ കഴിയുന്നവരുടെ ജീവിത നിലവാരം ഉയർത്തുന്നതിലും ഞങ്ങൾ പങ്കാളികളാണെന്ന് മേധാവി ലഫ്: ജനറൽ മുഹമ്മദ്‌ അഹ്‌മദ്‌ അൽ മർറി പറഞ്ഞു.ഡിജിറ്റൽ പരിവർത്തനവും ആരോഗ്യകരമായ ജീവിതശൈലിയും ഒരുമിപ്പിക്കുന്ന മികച്ച മാതൃകയാണ് ‘ദുബൈ സൈക്ലിംഗ് പാസ്’” എന്നും അദ്ദേഹം കൂട്ടിച്ചേർത്തു
ദുബൈ സ്പോർട്സ് കൗൺസിൽ സെക്രട്ടറി ജനറൽ സഈദ് ഹരേബ്, സമൂഹത്തിന്റെ ആരോഗ്യം, സന്തോഷം എന്നിവ വർധിപ്പിക്കുന്നതിൽ പദ്ധതി നിർണായക പങ്കുവഹിക്കുമെന്ന് അഭിപ്രായപ്പെട്ടു. അതേസമയം, ദുബൈ ടൂറിസം സി.ഇ.ഒ ഇസ്സാം കാസിം, കായിക–ആരോഗ്യ ജീവിതശൈലി ദുബൈയുടെ ആധുനിക തിരിച്ചറിവിന്റെ ഭാഗമാണെന്നും ഇത്തരം സംരംഭങ്ങൾ നഗരത്തിന്റെ ആഗോള ടൂറിസം ആകർഷണം കൂടുതൽ ശക്തിപ്പെടുത്തുമെന്നും പറഞ്ഞു.
ഡിജിറ്റൽ സൈക്ലിംഗ് പാസ്‌പോർട്ടിലൂടെ ഓരോ ട്രാക്കും പൂർത്തിയാക്കുമ്പോൾ വെർച്വൽ സ്റ്റാംപുകൾ ലഭിക്കുന്ന സംവിധാനവും, പ്രൊഫഷണൽ സൈക്ലിസ്റ്റുകൾക്കായി ഫിസിക്കൽ പാസ്‌പോർട്ടും യഥാർത്ഥ സ്റ്റാംപുകളും പദ്ധതിയുടെ പ്രത്യേകതയാണ്. ഏറ്റവും സജീവമായ പങ്കാളികൾക്ക് പ്രതീകാത്മക സമ്മാനങ്ങളും നൽകും.ഘട്ടംഘട്ടമായി നടപ്പാക്കുന്ന ഈ പദ്ധതി, സമൂഹ പങ്കാളിത്തം ശക്തിപ്പെടുത്തുകയും ദുബൈയെ ആഗോള കായിക–ആരോഗ്യ–ടൂറിസം കേന്ദ്രമായി കൂടുതൽ ഉറപ്പിക്കുകയും ചെയ്യുമെന്ന് ജനൽ ഡയറക്ടറേറ്റ് അറിയിച്ചു.