സേവന മികവുകൾ അടയാളപ്പെടുത്തി ഹംദാൻ ഫ്ലാഗ് ഉയർത്തി
ദുബൈ | ഗവൺമെന്റിന്റെ സേവന നയങ്ങൾ മികച്ച രീതിയിൽ നടപ്പിലാക്കിയതിന് ലഭിച്ച “ഹംദാൻ ഫ്ലാഗ്” ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (ജിഡിആർഎഫ്എ) ഉയർത്തി. ഗവൺമെന്റിന്റെ 360 സർവീസ് പോളിസി ഏറ്റവും കാര്യക്ഷമമായി നടപ്പാക്കിയതിന് കഴിഞ്ഞ ദിവസമാണ് ദുബൈ കിരീടാവകാശി ശൈഖ് ഹംദാൻ ബിൻ മുഹമ്മദ് ബിൻ റാശിദിൽ നിന്ന് പതാക ലഭിച്ചത്.
ഡയറക്ടറേറ്റിന്റെ മുഖ്യ കാര്യാലയത്തിൽ നടന്ന പരിപാടിയിൽ ദുബൈ പോലീസ് ആൻഡ് പബ്ലിക് സെക്യൂരിറ്റി ഡെപ്യൂട്ടി ചീഫ് ലെഫ്റ്റനന്റ് ജനറൽ ദാഹി ഖൽഫാൻ തമീം, ദുബൈ ജിഡിആർഎഫ്എ മേധാവി ലഫ്റ്റനന്റ് ജനറൽ മുഹമ്മദ് അഹ്മദ് അൽ മർറി, എക്സിക്യൂട്ടീവ് കൗൺസിൽ ജനറൽ സെക്രട്ടറിയേറ്റിലെ അസസ്മെന്റ് ആൻഡ് സ്റ്റഡീസ് ഡിപ്പാർട്ട്മെന്റ് ഡയറക്ടർ മിസ് ഈമാൻ അൽ സുവൈദി എന്നിവരുടെ സാന്നിധ്യത്തിലായിരുന്നു പതാക ഉയർത്തൽ . സർക്കാർ സേവനത്തിൽ അഭിമാനകരമായ നേട്ടം നേടിയതിന്റെ ഭാഗമായി നടന്ന ചടങ്ങിൽ ജിഡിആർഎഫ്എ ഉപമേധാവി മേജർ ജനറൽ ഉബൈദ് മുഹൈർ ബിൻ സുറൂർ അടക്കമുള്ള ഉന്നത ഉദ്യോഗസ്ഥരും ജീവനക്കാരും പങ്കെടുത്തു.
ജിഡിആർഎഫ്എയുടെ സർവീസ് മാനദണ്ഡങ്ങളിലെ വിപ്ലവാത്മകമായ മാറ്റങ്ങളെയാണ് ഈ നേട്ടം അംഗീകരിക്കുന്നതെന്ന് മേധാവി ലഫ്റ്റനന്റ് ജനറൽ മുഹമ്മദ് അഹ്മദ് അൽ മർറി പറഞ്ഞു.
