പുതുവത്സരാഘോഷ വിജയം
ശൈഖ് മുഹമ്മദിന്റെ പ്രശംസ
ദുബൈ |പുതുവത്സരത്തിന്റെ വരവറിയിച്ചു ദുബൈയിൽ വെടിക്കെട്ട് നടന്നത് 36 സ്ഥലങ്ങളിൽ.ദുബൈ നഗരത്തിൽ പുതുവത്സരാഘോഷം ഗംഭീരമാക്കിയ പിന്നണി പ്രവർത്തകരെ യു എ ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് അൽ മക്‌തൂം അഭിനന്ദിച്ചു . ഈ വർഷത്തെ ഏറ്റവും വലിയ രാത്രി ആഘോഷമായിരുന്നു കഴിഞ്ഞ ദിവസത്തേത് . പരിപാടിയുടെ വിജയം ഉറപ്പാക്കാൻ എണ്ണമറ്റ വ്യക്തികൾ തിരശ്ശീലയ്ക്ക് പിന്നിൽ അക്ഷീണം പ്രവർത്തിച്ചു. “55 സർക്കാർ ഏജൻസികൾ ഉൾപ്പെടുന്ന ഇവന്റ്സ് സെക്യൂരിറ്റി കമ്മിറ്റിക്ക് പ്രത്യേക നന്ദി.ദുബൈ നഗരത്തിന്റെയും എമിറേറ്റ്സിന്റെയും പേരിന് അനുയോജ്യമായ സുരക്ഷിതവും സുഗമവും മാന്യവുമായ ആഘോഷങ്ങൾക്ക് ഏവരും സംഭാവന നൽകി.”
190 രാജ്യങ്ങളിൽ നിന്നുള്ള ദശലക്ഷക്കണക്കിന് താമസക്കാർ, വിനോദസഞ്ചാരികൾ, കുടുംബങ്ങൾ, പ്രിയപ്പെട്ടവർ എന്നിവരെ ഈ മഹത്തായ പരിപാടി ആകർഷിച്ചു.ദുബൈ “ലോകത്തിന്റെ നഗരം” എന്ന് വിശേഷിച്ച ശൈഖ് മുഹമ്മദ്, നഗരത്തിന്റെ ആഘോഷങ്ങൾ സഹവർത്തിത്വത്തിന്റെയും സഹിഷ്ണുതയുടെയും നാഗരികതയുടെയും ഒരു ആഗോള മാതൃകയാണെന്ന് പറഞ്ഞു. ” ഈ ആഘോഷങ്ങളിൽ പങ്കെടുത്ത,ലോകത്തിന്റെ പല ഭാഗങ്ങളിലായി സംവദിച്ച, ഞങ്ങളുമായി പങ്കുവെച്ച എല്ലാവർക്കും നന്ദി ” ശൈഖ് മുഹമ്മദ് പറഞ്ഞു .
“ലോകത്തെ സ്വാഗതം ചെയ്യുകയും ലോകത്തിന് മാതൃകയായി നിൽക്കുകയും ചെയ്യുന്ന ഒരു രാജ്യമായി എമിറേറ്റ്സ് മാറട്ടെ.,എല്ലാവർക്കും പുതുവത്സരാശംസകൾ,” ശൈഖ് മുഹമ്മദ് കുറിച്ചു
