തിരക്കുള്ള സമയങ്ങളിൽ സാലിക് നിരക്ക് വർധിക്കും

കനത്ത തിരക്കുള്ള സമയങ്ങളിൽ കൂടുതൽ നിരക്ക് ,പുതിയ സാലിക് ഫീസ് 31 മുതൽ

ദുബൈ |കനത്ത ഗതാഗതമുള്ള സമയങ്ങളിൽ കൂടുതൽ നിരക്ക് ഏർപ്പെടുത്തുന്ന സാലിക് സംവിധാനം ഈ വർഷം ജനുവരി 31 മുതൽ ആരംഭിക്കുമെന്ന് കമ്പനി വെള്ളിയാഴ്ച അറിയിച്ചു .പ്രവൃത്തി ദിവസങ്ങളിൽ, രാവിലെ തിരക്കുള്ള സമയങ്ങളിൽ (രാവിലെ 6 മുതൽ 10 വരെ) വൈകുന്നേരത്തെ തിരക്കുള്ള സമയങ്ങളിൽ (വൈകുന്നേരം 4 മുതൽ രാത്രി 8 വരെ) നിരക്ക് മണിക്കൂറിനു 6 ദിർഹമായിരിക്കും. ഓഫ്-പീക്ക് സമയങ്ങളിൽ, രാവിലെ 10 മുതൽ വൈകുന്നേരം 4 വരെയും, രാത്രി 8 മുതൽ പുലർച്ചെ 1 വരെയും, നിരക്ക് 4 ദിർഹമായിരിക്കും.
പൊതു അവധി ദിവസങ്ങൾ, പ്രത്യേക അവസരങ്ങൾ അല്ലെങ്കിൽ പ്രധാന പരിപാടികൾ ഒഴികെയുള്ള ഞായറാഴ്ചകളിൽ, ദിവസം മുഴുവൻ ടോൾ 4 ദിർഹമായിരിക്കും. പുലർച്ചെ ഒന്ന്മുതൽ രാവിലെ 6 വരെ സൗജന്യമായിരിക്കും.
റമസാനിൽ പ്രവൃത്തിദിവസങ്ങളിലെ തിരക്കുള്ള സമയങ്ങളിൽ രാവിലെ 9 മുതൽ വൈകുന്നേരം 5 വരെ 6 ദിർഹവും പ്രവൃത്തിദിവസങ്ങളിലെ തിരക്കില്ലാത്ത സമയങ്ങളിൽ, രാവിലെ 7 മുതൽ രാവിലെ 9 വരെയും, വൈകുന്നേരം 5 മുതൽ പുലർച്ചെ 2 വരെയും 4 ദിർഹമായിരിക്കും .
ഞായറാഴ്ചകളിൽ (പൊതു അവധി ദിവസങ്ങളിലും പ്രധാന പരിപാടികളിലും ഒഴികെ), ഫീസ് രാവിലെ 7 മുതൽ പുലർച്ചെ 2 വരെ ദിവസം മുഴുവൻ 4 ദിർഹവും പുലർച്ചെ 2 മുതൽ രാവിലെ 7 വരെ സൗജന്യവുമാണ്.
അൽ സഫ നോർത്ത്, അൽ സഫ സൗത്ത് ടോൾ ഗേറ്റുകൾ എന്നിവടങ്ങളിൽ ഒരു മണിക്കൂറിനുള്ളിൽ വീണ്ടും കടന്നുപോകുമ്പോൾ ചാർജ് രീതിയിൽ മാറ്റമില്ലെന്ന് സാലിക് ചൂണ്ടിക്കാട്ടി.നിലവിൽ, നഗരത്തിലുടനീളമുള്ള 10 ടോൾ ഗേറ്റുകളിൽ ഏതെങ്കിലും കടന്നുപോകുമ്പോൾ സാലിക് 4 ദിർഹം നിശ്ചിത ഫീസ് ഈടാക്കുന്നുണ്ട്.
വേരിയബിൾ പാർക്കിംഗ് താരിഫ് നയം 2025 മാർച്ച് അവസാനത്തോടെ പൂർണമായും നടപ്പിലാക്കാൻ തീരുമാനിച്ചിട്ടുണ്ട്. രാവിലെ പീക്ക് സമയങ്ങളിലും (രാവിലെ 8 മുതൽ 10 വരെ) വൈകുന്നേരത്തെ പീക്ക് സമയങ്ങളിലും (വൈകുന്നേരം 4 മുതൽ രാത്രി 8 വരെ) പ്രീമിയം പാർക്കിംഗ് സ്ഥലങ്ങൾക്ക് മണിക്കൂറിന് 6 ദിർഹവും മറ്റ് പൊതു പെയ്ഡ് പാർക്കിംഗ് സ്ഥലങ്ങൾക്ക് മണിക്കൂറിന് 4 ദിർഹവും ഫീസ് നിശ്ചയിച്ചിട്ടുണ്ട്. ഓഫ്-പീക്ക് സമയങ്ങളിൽ, രാവിലെ 10 മുതൽ വൈകുന്നേരം 4 വരെയും, രാത്രി 8 മുതൽ രാത്രി 10 വരെയും നിരക്കുകൾ മാറ്റമില്ലാതെ തുടരും. രാത്രിയിൽ, രാത്രി 10 മുതൽ രാവിലെ 8 വരെയും, ഞായറാഴ്ചകളിലും പാർക്കിംഗ് സൗജന്യമായിരിക്കും.
പരിപാടികൾ നടക്കുന്ന സ്ഥലങ്ങൾക്ക് സമീപമുള്ള പൊതു പാർക്കിംഗ് സ്ഥലങ്ങൾക്ക് മണിക്കൂറിന് 25 ദിർഹം ഫീസ് ഏർപ്പെടുത്തും . 2025 ഫെബ്രുവരി മുതൽ പ്രധാന പരിപാടികൾ നടക്കുമ്പോൾ ദുബൈ വേൾഡ് ട്രേഡ് സെന്ററിന് ചുറ്റുപാടും ഈ നയം തുടക്കത്തിൽ നടപ്പിലാക്കുമെന്ന് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർ‌ടി‌എ) അറിയിച്ചു.