ശിന്ദഗ ഇടനാഴി നവീകരണം

ദുബൈ |അൽ ശിന്ദഗ ഇടനാഴി നവീകരണ പദ്ധതിയിൽ നാലാം ഘട്ടത്തിലെ രണ്ടാമത്തെ പാലം റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ‌ടി‌എ) തുറന്നു. അൽ മിന സ്ട്രീറ്റ്, ശൈഖ് റാശിദ് റോഡ് എന്നിവയുടെ കവലയിൽ നിന്ന് ശൈഖ് ഖലീഫ ബിൻ സായിദ് സ്ട്രീറ്റ്, ശൈഖ് റാശിദ് റോഡ് എന്നിവയുടെ കവലയിലേക്കുള്ള ഗതാഗതം സുഗമമാക്കുന്നതാണ് പാലം. മണിക്കൂറിൽ 3,200 വാഹനങ്ങൾക്ക് സഞ്ചരിക്കാൻ കഴിയുന്ന രണ്ട് പാതകൾ ഉൾപ്പെടുന്ന 605 മീറ്റർ ദൈർഘ്യമുള്ള പാലമാണിത്. നാലാം ഘട്ടത്തിൽ എല്ലാ പാതകളിലുമായി ആകെ 3.1 കിലോമീറ്റർ നീളമുള്ള പാലങ്ങൾ ഉൾപ്പെടുന്നു . മണിക്കൂറിൽ ഏകദേശം 19,400 വാഹനങ്ങൾ സഞ്ചരിക്കാവുന്ന ശേഷിയുണ്ട് .
ആദ്യത്തെ പാലം 2024 ഡിസംബറിൽ തുറന്നു. ശൈഖ് ഖലീഫ ബിൻ സായിദ് സ്ട്രീറ്റ്, ശൈഖ് റാശിദ് റോഡ് എന്നിവയുടെ കവലയിൽ നിന്ന് അൽ മിന സ്ട്രീറ്റിലേക്കും ഫാൽക്കൺ ഇന്റർസെക്ഷനിലേക്കും ഉള്ള ഗതാഗതം ഇത് സുഗമമാക്കുന്നു. മൂന്ന് പാതകളിലും മണിക്കൂറിൽ 4,800 വാഹനങ്ങൾക്കു സഞ്ചരിക്കാം . 1,335 മീറ്റർ ദൈർഘ്യമുണ്ട് .
2025 ന്റെ രണ്ടാം പാദത്തിൽ മറ്റൊരു പാലം പൂർത്തിയാകാൻ പോകുന്നു. അൽ മിന സ്ട്രീറ്റിൽ നിന്ന് ശൈഖ് ഖലീഫ ബിൻ സായിദ് സ്ട്രീറ്റും ശൈഖ് റാശിദ് റോഡും തമ്മിലുള്ള കവലയിലേക്കുള്ള ഗതാഗതത്തിന് ഇത് സഹായകമാകും. ഈ മൂന്ന് വരി പാലത്തിനു 1,210 മീറ്റർ നീളവും മണിക്കൂറിൽ 4,800 വാഹനങ്ങൾക്ക് സഞ്ചരിക്കാനുള്ള ശേഷിയുമുണ്ട്.കൂടാതെ, അൽ മിന സ്ട്രീറ്റിൽ നിന്ന് അൽ വാസൽ റോഡിലേക്കുള്ള ഗതാഗതം സുഗമമാക്കുന്നതിനായി 2025 ലെ രണ്ടാം പാദത്തിൽ മൂന്നാമത്തെ പാലം പൂർത്തിയാകാൻ പദ്ധതിയിട്ടിട്ടുണ്ട്.
ജുമൈറ സ്ട്രീറ്റ്, അൽ മിന സ്ട്രീറ്റ്, ശൈഖ് സബാഹ് അൽ അഹമ്മദ് അൽ ജാബർ അൽ സബാഹ് സ്ട്രീറ്റ് എന്നിവിടങ്ങളിലെ ഉപരിതല കവലകളിലെ മെച്ചപ്പെടുത്തലുകളും 4.8 കിലോമീറ്റർ റോഡുകളുടെ വികസനവും പദ്ധതിയിൽ ഉൾപ്പെടുന്നു. തെരുവ് വിളക്കുകൾ, ഗതാഗത സംവിധാനങ്ങൾ, മഴവെള്ള ഡ്രെയിനേജ് ശൃംഖലകൾ, ജലസേചന സംവിധാനങ്ങൾ എന്നിവ ഇതിൽ ഉൾപ്പെടുന്നു.